കണ്ണൂർ: വീണാ ജോർജ് കേസിൽ വീണ്ടും ട്വിസ്റ്റ്. മുൻ മന്ത്രി വീണാ ജോർജിനെ ആക്രമിച്ചെന്ന കേസിൽ തന്‍റെ പേരിലുള്ളത് വ്യാജ മൊഴിയെന്ന് വനിതാ എസ്ഐ. സംഭവദിവസം റെയിൽവേ സ്റ്റേഷനിൽ മന്ത്രിയുടെ സുരക്ഷാ ചുമതലയിലുണ്ടായിരുന്ന കണ്ണൂർ ടൗൺ മുൻ എസ്ഐ ദീപ്തിയാണ് പ്രത്യേക അന്വേഷണ സംഘത്തിന് ഇതുസംബന്ധിച്ച മൊഴി നൽകിയത്. ആദ്യ അന്വേഷണ സംഘം തന്‍റെ മൊഴി രേഖപ്പെടുത്തിയിട്ടില്ലെന്നും എസ്ഐ പ്രത്യേക അന്വേഷണ സംഘത്തിന് മുന്പാകെ വെളിപ്പെടുത്തി.
ബഹളമുണ്ടായപ്പോൾ മന്ത്രിയെ എത്രയും പെട്ടെന്ന് സ്ഥലത്തുനിന്ന് നീക്കാനാണ് ശ്രമിച്ചത്. ഇതിനിടെ കെഎസ്‌യു പ്രവർത്തകർ മന്ത്രിയെ ആക്രമിക്കാൻ ശ്രമിച്ചതായി ശ്രദ്ധയിൽപ്പെട്ടില്ലെന്നുമാണ് എസ്ഐ പ്രത്യേക അന്വേഷണസംഘത്തിന് മൊഴി നൽകിയത്. കെഎസ്‌യു പ്രവർത്തകരുടെ ആക്രമണത്തിനിടെ മന്ത്രി തെറിച്ചുപോയെന്ന് ആദ്യ അന്വേഷണസംഘം തന്‍റെ പേരിൽ കള്ളമൊഴി രേഖപ്പെടുത്തിയതാണെന്നും ദീപ്തി പ്രത്യേക അന്വേഷണ സംഘത്തോട് മൊഴി നൽകിയതായാണ് വിവരം.
കഴിഞ്ഞ ഫെബ്രുവരി 25നായിരുന്നു കേസിനാസ്പദമായ സംഭവം. മന്ത്രിയുടെ ഗൺമാൻ നൽകിയ മൊഴിയുടെ അടിസ്ഥാനത്തിലാണ് അഞ്ച് കെഎസ്‌യു പ്രവർത്തകർക്കെതിരേ വധശ്രമം ഉൾപ്പെടെയുള്ള വകുപ്പുകൾ ചുമത്തി കേസെടുത്ത് ജയിലിലടച്ചത്. എന്നാൽ ആയുധം ഉപയോഗിച്ച് പ്രതിഷേധക്കാർ മന്ത്രിയെ ആക്രമിക്കൻ ശ്രമിച്ചെന്ന ആദ്യം നൽകിയ മൊഴി ഗൺമാൻ ഇപ്പോൾ പ്രത്യേക അന്വേഷണസംഘത്തിന് മുന്പാകെ തിരുത്തിയെന്നാണ് വിവരം.
മന്ത്രിയെ ആക്രമിക്കാൻ ശ്രമിക്കുന്നത് കണ്ടിട്ടില്ലെന്നും മന്ത്രിയുടെ നിർദേശപ്രകാരമാണ് അത്തരത്തിൽ മൊഴി നൽ‌കിയതെന്നും ഗൺമാൻ പ്രത്യേക അന്വേഷണ സംഘത്തിന് നൽകിയ മൊഴി. അതിനിടെ കേസിൽ പ്രതി ചേർക്കപ്പെട്ട കെഎസ്‌യു പ്രവർത്തകരായ സി.എച്ച്. മുബാസ്, എം.സി. അതുൽ, വിതുൽ ബാലകൃഷ്ണൻ, മൂഹമ്മദ് യാസീൻ, അക്ഷയ് മാടായി എന്നിവർ ഇന്നലെ പ്രത്യേക അന്വേഷണ സംഘത്തിന് മുന്പാകെ ഹാജരായി മൊഴി നൽകി.
ആരോഗ്യമേഖലയിലെ കുത്തഴിഞ്ഞ അവസ്ഥയിൽ പ്രതിഷേധിച്ച് മന്ത്രിക്കു നേരെ കരിങ്കൊടി കാട്ടുക മാത്രമാണ് തങ്ങൾ ചെയ്തെന്നും എന്നാൽ രാഷട്രീയ ഗൂഢാലോചനയുടെ ഭാഗമായി വധിക്കാൻ ശ്രമിച്ചെന്ന കള്ളക്കേസെടുക്കുകയായിരുന്നുവെന്നാണ് ഇവർ മൊഴി നൽകിയത്.
